هل يعرف ابناءك انك تحبهم ؟
مفيش أب أو أم مش بتحب أولادها
و كل واحد بيعبر بطريقته الى اتعود عليها على التعبير عن حبه
لكن هل ابنك عارف و متأكد انك بتحبه ؟
و الا طول النهار يسألك ...هل انت بتحبنى ؟
و دا معناه انه شاكك
او تلاقيه دايما يقول : انت مش بتحبنى
و دا معناه انه مش حاسس بحبك ليه
و ان خزان قلبه فارغ من الحب
و دا خطره عظيم ...
لان دا بيخليه دايما حاسس انه ليس أهل للحب و بيحطم صورته الذاتية عن نفسه
وبيفقده الثقة فى نفسه
و يحسسه بعدم الامان و دا هيخليه دايما غاضب و متوتر و غير مستقر نفسيا و ممكن يقوده الى العدوان و ان الناس كلها وحشين او الانعزالية و الخوف و الخجل
ساعات نحب نسأل اولادنا هل بتحبنى ؟
و ساعات نسألهم بتحب بابا اكتر و الا ماما ؟
لكن عمرك سألتهم هل بابا و ماما بيحبوك ؟
طبعا لانك فاهم ان دى بديهية محدش يسأل فيها
لو سألتهم السؤال دا هتلاقى العجب
و هتحس اد ايه الاطفال محرومين من الحب
و هتلاقى بعض الاطفال بيجاوبوا اجابة قاطعة لأ
و بعضهم بيجاوب معرفش او يسكت او بيتردد
و القليل جدا الى هتكون اجابته ايوة بمنتهى الثقة
طيب اسأل نفسك كدة و انت كبير
هل بابا و ماما كانوا بيحبونى ؟
هل حسيت بحبهم ليك
و جاوب بمنتهى الصراحة
متحاولش تقنع نفسك بالعقل ان العنف و الشدة و الضرب و الشتيمة و التهديد و الاهانة دول كانوا علشان مصلحتك
لانك لو مقتنع بكدة هتمارسه على ولادك برده
المشكلة مش ان الاباء و الامهات مش بيحبوا ولادهم
المشكلة فى انهم مش بيعرفوا يعبروا عن حبهم صح
و بيستسهلوا طريق العنف لانه نتايجه اسرع
مع ان الحب يصنع المعجزات و نتايجه راااائعة بس على المدى البعيد ...
و عن تجربه...
على كل أم تسأل أولادها. .هل ماما وبابا بيحبك. ..
واكتبى لنا الاجابه فى تعليق
فى انتظار تعليقاتكم ...
إرسال تعليق